عزيزتي ماما المحروسة بلد الظلم والفساد (الآمن والآمان سابقاً)
صباح الخير بس هييجي منين الخير وانتي حالك في النازل كده ولا يسر معارضة ولا اخوان .. ياللا نصيبنا
أكتب لكي هذه الرسالة بمناسبة عيد الأم عشان أقولك "كل سنة وانتي طيبة ياست الكل يا محروسة" أصلهم بيقولوا انك أمي ولاحظي ان دي أول مرة أقولك "كل سنة وانتي طيبة" في عيد الأم ... ده بس عشان أفكرك انك أمي لان من الواضح كده انك هتطلعي في الآخر مرات أبويا
متبصيليش كده وحياة أبوكي عشان انتي فعلا بتعامليني معاملة مرات الأب وبلاش والنبي تسمعيني اسطوانة انك كبرتيني وعلمتيني وعملتي مني مهندسة آآآآآآآآد الدنيا ... أحب أقولك ان اللي كبرني هما أبويا وأمي ... أبويا اللي اشتغل أكتر من خمسة وتلاتين سنة في الحكومة ومقدرش يركب عربية نص عمر حتى وأمي اللي بقالها عشرين سنة بتحوش عشان تطلع تحج هما اللي ربوني اللي طافحين الدم وضيعوا عمرهم فيكي عشان بس يقدروا يربوني كويس أنا واخواتي ... وبالنسبة للتعليم بقى يا حاجة مش غرور اني اقولك ان أكيد قدراتي العقلية هي اللي ساعدتني عشان أنجح مش جنسيتك وإلا فمطلعتيش ليه كل ولادك مهندسين يا أم الدنيا ؟؟؟!!! وميخفاش عليكي ان الدروس الخصوصية هي المكان اللي فعلا بيتعلم فيه التلامذة مش فصول مدارسك وبالتالي انا اتعلمت بفلوس أبويا مش من خيرك .... أما بالنسبة بقى لحكاية مهندسة آآآآد الدنيا دي فلازم تعرفي اذا كنتي متعرفيش اني مهندسة آه بس مع ايقاف التنفيذ و ده لسبب بسيط وهو ان قطاع التشييد كله حراميه ونصابين أصل أنا بعيد عنك وعن السامعين باعتبر نفسي من أصحاب المباديء وطالما مبقدرش أغير نظام السرقة في شركتي باخلع منها بهدؤ عشان مساعدش فيها ولازم تعرفي ان اللي علمني شوية المباديء دول هي الحاجة أمي مش حضرتك ....
بالنسبة بقى للشعارات الكدابة زي "وطن" فياريت تجاوبيني على سؤال "يعني ايه وطن؟" أصل الوطن لما يتهان فيه أولاده ميبقاش وطن والواد اللي ميلقاش من أبوه الحنية "معيحبوش" ولا أنتي رأيك ايه ؟! ولو الوطن هو الحماية والدفى والآمان فبلاش تفتكري اني باعايرك لما أقولك سلميلي ع الجيش والشرطة وبالنسبة للحنين والحب الحب الشوق الشوق فانتي عارفه طبعا ان كل ده كلام روايات وأفلام مبيأكلش عيش وبنزرعه في ولادنا عشان نفرض عليهم يحبوكي لما منلقاش فيكي سبب نقنعهم بيه يحبوكي وعلى فكرة بقى لو كنت اتولدت في أي حتة في الدنيا وأهلي مضحكوش عليا بكلمة حنين وغربة وتاريخ وحضارة كنت أكيد هاعتبر البلد اللي انا عايشه فيها وطني أصل الأم اللي بتربي يا محروسة مش اللي بتخلف عيال وترميهم في الشارع ...
إلا بالمناسبة يا أم الدنيا .. لحد امتى هابعتلك رسايل ومترديش حتى لو كان الرد "معلش" ولحد امتى هتفضلي عارفه وشايفه وساكته !!!
كفاية بقى عليكي كده عشان ما ألخبطش في الكلام أكتر من كده وانتي عارفه ان الاخوان بيتجسسوا على رسايلنا سوا
ليست هناك تعليقات:
إرسال تعليق