صفحة بيضا ....

"صفحة بيضا" هكذا أسميها ... أيوة صفحة بيضا !!!

7 رمضان ... حسيت ان ربنا بيستجيب ليا دعوة كبيرة وبسرعة لأول مرة ... كنت حاسة ان ربنا بيوريني معجزات ... أول مرة أحس بكمية القرب دي من  ربنا ... كنت حاسة ان ربنا التفت ليا ... عارف يعني ايه ربنا يلتفت ليك ؟! ياااااااااه دي حاجة كبيرة أوي ... أنا اللي كلي ذنوب ومعاصي ربنا يلتفت ليا أنا ؟!  ياااااااااه يارب ده انت حنين أوي ... ايه يارب الرحمة والحنية دي ... انت قريب أوي يارب ... كأنك بس يارب كنت منتظرني أقولك أنا جيالك بقلب سليم عشان تفتحلي بابك ... والله يارب انا بحبك أوي بس نَفسي ضعيفة وأمارة بالسؤ ... يارب قويني عليها ....

في أول ساعة في صفحتي البيضا بأصحى على انسان بيظلمني ويتهمني ويسيء الظن فيا ... وطبعا للوهلة الأولى اتعصبت جدا وكنت هارد بغباوة بس قولت احنا في رمضان مينفعش أتعصب وبدأت أتكلم بهدؤ وموضوعية ولما بدأت الكلام افتكرت "والكاظمين الغيظ والعافين عن الناس" قولت يارب أشهدك اني عفيت عنها ومسمحاها يارب وبعدها بلحظة افتكرت الدعوة اللي انا بادعيها في كل صلاة "اللهم انك عفو تحب العفو فاعف عني" ...  بادعيها من قلبي أوي وأنا باستحضر ذنوبي وباستحضر رحمة ربنا وثقتي فيه ....
ساعتها فرحت وحسيت ان ربنا بيختبرني كنت باقول لنفسي ماهو مينفعش ربنا يعفي عني وأنا مبعفيش عن عباده

... فرحت جدا جدا وحسيت ان ربنا بيختبر صدق دعوتي J

بعدها بساعات ... اكتشفت ان شخص عزيز عليا بيكدب عليا وبيستغلني وبيستندل اوي معايا ... ده ايه اليوم العجيب ده !!! قلبي اتوجع وكنت ناويه أقلبها دراما بقى وعياط ومناديل وحركات ;-) بس الدعوة بتاعتي أنقذتني لما افتكرتها ... ابتسمت ابتسامة حزينة (زي دي J ) ... قولت بسرعة يارب أشهدك اني عفيت عن فلان وكانت لسه الابتسامه الحزينه على شفايفي ... ابتسامة الصدمة ... وبيمر على بالي كل اللي ظلموني في حياتي أو أذوني ... ابتسمت ابتسامة عريضه ومن قلبي وأشهدت ربنا اني عفيت عن كل اللي ظلمني وأساء ليا طول حياتي J

ايه اللي بيحصلي ده !!!!!!!!!!!

لأ مش كفاية ... مش بس اللي غلطوا فيا ... في ناس كتير أنا زعلتهم وغلطت فيهم ... ساعتها حسيت باحساس وحش ... ازاي الناس دي تسامحني وتعفي عني ... ملقتش غير اني أدعي ربنا يرقق قلوبهم ويسامحوني ويعفوا عني .... ما هو أكيد ربنا مش هيعفي عن ذنب واللي أذنبت في حقه مش مسامحني ........ احباااااااااااااااط !!!!!

ورغم الاحباط مبسوطة وحاسة ان ربنا بيبصلي ومهتم بدعوتي ... ياااااه فرحانه أوي يارب بالمواقف اللي بتحطني فيها ...

قضيت باقي اليوم افكر في الموقفين اللي حصلولي واعتبرت اليوم ده زي الصفحة البيضا في حياتي وقررت أعمل شوية حاجات مش عارفه اذا كانت صغيره ولا كبيرة ... الحاجات دي مش هتخلي باقي أيامي صفحات بيضا بس هتقلل التلوث اللي مالي أيامي ... ايه ده هو أنا ملوَثة ؟! ... للأسف آه أنا ملوثة بذنوب كتير ومعاصي كتير L اذن فلنقلل التلوث اليومي ولنرفع شعار "نحو بيئة حياتية نظيفة"  ;-)