هي : عارف انك كنت زي القمر
هي : عارف اني كنت هاموت من الغيرة لما شوفتك جنبها في الكوشة
هي : كنت شايفة نفسي جنبك مكانها وكان شكلنا حلو أوي وكانت عنيا مليانة فرحة
هي : كل الناس اللي حوالينا هيبصولنا ويقولوا بصوت واطي ان الفرحة هتنط من عنيا واني عايزة أقولك قوم ياللا نروح بيتنا ... كلهم ياحبيبي عارفين انك حبيبي وانك أحلى وأصعب حلم حلمته في حياتي واني وانا جنبك بفستان أبيض حققت كل أحلامي
هي : نفسي منعملش فرح عشان هاتغاظ أوي لما البنات يبصولك ويحسدوني عليك مانت هتبقى أحلى عريس حصل في الدنيا واحتمال تخليني أرتكب جريمة في الفرح عشان انت حبيبي لوحدي وبتاعي أنا بس وممنوع حد يقرب منك أو يبصلك
هي : عارفه اني ساعتها لما هاقولك "اتلم" هتتعمد تغيظني عشان تخليني أغير عليك أكتر ... انت وحش على فكرة ... مينفعش تبقى رخم حتى في فرحنا وهاخاصمك على فكرة ... آه هاخاصمك في الفرح ومش هاتصالح غير لما تقوللي "بحبك" وتسمعها لكل الناس ومصممة ومش هاقبل أعذار ماهو خلاص يا حبيبي كلهم عارفين اني حبيبتك وانك ليا لوحدي وانا ليك لوحدك لحد ما اموت
هي : تعرف لما فرجتني على صورتك جنبها في الكوشة وقولتلي "ايه رأيك في مراتي" كنت هاطلع المطواه وأشق بطنك نصين ياروحي وأخلي المصارين في ناحية والكبد في ناحية وأمد دراعي في بطنك يا حبيبي أطلعه من زورك وأسحب لسانك وأطلعه من بطنك وأقطعه عشان قولتلي كده ....
هي : أكيد مش هتهون عليا بس انت كمان بتستفزني وبتعصبني ... في حد يقول لحبيبته اللي هتموت على اليوم اللي تبقى فيه مراته "ايه رأيك في مراتي" ايه أم الرخامه اللي انت فيها دي
هي : آه باغير عليك من أختك ومن مامتك ومن هدومك اللي انت لابسها والهوا اللي بتتنفسه والتراب اللي انت بتمشي عليه
هي : طبيعي لازم أغير عليك .. ياحبيبي انت كنت أحلى من العريس نفسه بكتير يبقى ازاي مغيرش عليك
هي : طبعا بحبك للدرجادي وأكتر كمان ... انت دنيتي كلها ... ده انا مبعرفش اشوف العالم إلا بعنيك ... ومعرفش معنى للرجولة غيرك ومعرفش معنى لأنوثتي غير اني أكون معاك ... أنا من غيرك ولا حاجه ... باعشقك .. أنا باعشقك
هي : حبيبي هنتجوز امتى بقى ؟!
هو : خخخخخخخخخخخخخخخخخخخخخخخخخخخخ (صوت شخيره ع التليفون جايب آخر الشارع)
أنا في البيت
ردحذف